飄移問題

如果你問只是用原裝 TT-02 + 沒有 brake 功能的有刷白豬磨打
在油麻地渡船街車場來玩飄移得唔得呢
咁要視乎你心目中 "能" 同 "不能" 既定義
能
當然可以啦, 仲唔需要你所講既高超控制技巧添, 砌完落去放車, 搞掂, 冇野需要改
不能
如果你想講玩到好似比賽啲車咁像真, 又或者大角度甩尾甩到曉飛咁既話呢
都係唔駛高超控制技巧, 因為冇可能做到, 就算世界冠軍黎到你俾呢組野佢都冇用

坦白講, 俾我既話就索性慳埋果3百蚊, 乜都唔改
點解咁講
如果你而家玩緊果部係TT02
學AMAT話齋, 我會淨係換四條飄移呔過下手癮算喇

你講果種入灣前收油, 轉左轉右反方向操控呢架車係做唔到
要玩到呢d操控, 最最最起碼要買後驅D4先得
但買D4, 咁不如買YD-2或者MST
呢幾部先係正統後驅飄移車
但出部呢啲車, 最平都成千蚊咁濟

咁都可以用3百幾換上面介紹果幾套裝備既
但好驚你會發覺改完玩落又唔係你心目中果回事
跟住又買, 又改, 又唔得, 再買, 再改, 都唔得
最後發現原來加加埋埋已經可以一早出部正統
點解我會咁講?
因為好多入飄移坑的人都經歷過行呢d冤枉路
包括我啦當然
我都係唔知頭唔知路, 由雙星買起
但最後發現原來嘥左好多無謂錢
少少意見咋, 當參考下囉~

因為四驅飄車同後驅飄車係兩種唔同屬性既車黎
基本上而家好少人會入門玩四驅
絕大部份都係買後驅車
你問會否只是後駒推動的車較4駒推動的車會更易做到飄移？
冇錯呀, 後驅同四驅個分別
就係後驅做出黎既動作更像真, 會大幅度擺尾, 需要你講既反方向扭呔, 講求飄移姿態
而四驅特色就類似rally, 冇大幅度擺尾反手呔操作, 適合玩花式動作

你話想過下手癮啫, 唔想一黎俾幾千蚊落坑喎
咁緊係買部雙星或者國產玩具玩下算啦
仲要千祈唔好走去改喎, 因為改完都肯定玩唔到正統飄移車十分一咁既模樣
所以我會先問清楚自己
純粹過癮下既 --->雙星
唔係, 我係諗住長玩架喇 --->尾驅甩尾車
如果你諗住 "買架雙星先, 到時候再改囉, 享受下升級既樂趣丫麻" 既話呢
咁你最後就會返黎呢度
跟住出兩個post
一個係二手買賣區
"放田宮九成新TT02-D全金屬op連電子野"
另一個應該係飄移區
"請問買yokomo yd2 EX2S 好定 MST RMX 2.0 KMW 好? 求意見"
咁我緊係唔忍心見你出第一個post啦