RC EVOLUTION - 遙控工房 - 香港RC遙控車討論區

標題: 3racing市場策略改變 [打印本頁]

作者: tc3driver 時間: 2020-3-18 10:46
標題: 3racing市場策略改變
近日見3racing將推出新車，似乎想學Yokomo走每年新款路線，今次改埋頭直，牙差(38改32)，前後皮帶，底板，二樓，麼打座……改動算大，以現時社會經濟環境，3racing出新車都算幾進取，上年桇20M推出時，好明顯是沒有做足測試，皮帶鬆，二樓板，油壓架易斷，都未夠一年已再推新車，新車有多項零件改動，如不兼容舊款或其他型號，將會陷入缺零件情況，eg, 20M隻38T差速已經難買
零件太多又不兼容，舖頭就難入貨

作者: garywong5368 時間: 2020-3-18 11:56
我玩埋部2K18不再沾手了

作者: AMAT 時間: 2020-3-18 12:26
唔覺得YOKOMO有年年出新車唧。
你話有配件上改良呢個係正常唧，咁梗係有新狀況就改動下啦。

要知多數車有所改動，都係基於果一年會有咩比賽，同場地係乜。
舉例果年IFMAR係鬥乜，又或者果年係冇IFMAR係鬥ETS多等等.......
因為佢地都要出一架車俾啲人去鬥果啲賽事，又或者係鬥完之後佢地有乜改良。
總唔會係有新數據再等三五七年先出。

至於話測試，每架車都有佢地所謂主場，舉例3RACING主場明顯係PYC。
咁你一架車出之前，可唔可能試晒咁多可能性呢?唔可能嗎。
有試測試唔係話係個場走幾圈，仲要比賽先見真章，而試又唔可以一兩個人。
如果咁搞法，架車測試到出街，冇返一年半載都唔駛諗。

可能大家唔理解，但RACING TOURING從來都唔係最賣得多，賣到錢。
我當你最勁，一架TOURING出其實可能只係全球賣兩三千架，3RACING冇全球市場可能只係一千都唔到都一啲都唔出。
仲要放咁多測試時間，你冇可能同其他牌子比拼。

至於係咪去到一個架車問題多到行唔到，至少我唔覺得係先。
你話20M冇試真就賣，其實好多車都會啦，田宮420夠係咁斷前直濕杯啦，咁佢又係咪冇測試呢?
有時有一啲環境係冇可能試晒。
舉例你話爛件，人地手車冇撞就真係試唔到。
當然，經常都話，一架遙控車設計出嚟係為快而唔係為撞。

我都有架20M，我唔覺得佢係差先。
當然你搵佢嚟同XRAY/YOKOMO比，咁係係冇得比。

作者: pdaman 時間: 2020-3-18 22:10
本帖最後由 pdaman 於 2020-3-18 22:12 編輯

我一向都有玩3racing車，頭驅四驅中置M車都有，咁價錢有去到呢個質素真係交足功課，話易難就真係唔覺，朋友玩貴車兩野都要換，件又貴，佢買件方便就好重要，如果話20M為一係覺得佢兩條頭三節棍玩幾玩就好大虛位。

作者: AMAT 時間: 2020-3-19 00:57

pdaman 發表於 2020-3-18 22:10
我一向都有玩3racing車，頭驅四驅中置M車都有，咁價錢有去到呢個質素真係交足功課，話易難就真係唔覺，朋友 ...

我3RACING車唔多，MG EVO, M4, 20M......
當然，我唔會話佢係完美，佢係有甩漏，但係佢好多位其實做得分分鐘比貴價車用心。
架車亦都好有祺哥影子係入面，因為係佢設計嗎。
可能同祺哥宜家叫做熟啲，我覺得咁樣反而先至覺得架車有趣~

作者: 樂天熊仔 時間: 2020-3-19 09:24
3R創意無限 e.g FGX , F113

作者: sean2013 時間: 2020-3-19 12:09
膠料始終唔得

作者: gos 時間: 2020-3-19 16:57
可否講下膠料怎樣唔得

作者: hing830 時間: 2020-3-19 21:16
曾經砌過幾部佢出膠車，膠波箱同臂碼收螺絲可以好實，只係車臂Pin同防傾桿嗰粒2.6MM較鬆，只要自巳就下力度都無什麼大問題，整體膠件好過田官車，樓上師兄所講膠件晤得，你曾經有不愉快事件了？

作者: AMAT 時間: 2020-3-20 12:49
3RACING膠件，睇係咩車喇。

如果話啲臂呢，我唔覺得有問題。

如果係話佢啲膠車波箱呢，係偏軟。
如果係話佢皮帶tension果啲太軟塌牙呢，都係，但不至於甩螺絲亦唔係受力(方向受力)。
如果話啲膠收水有偏，都可以話係，但田宮都會。

田宮會唔會好啲呢?
個人覺得，田宮車好有趣，啲膠有偏都行到，因為佢配好慢摩打俾你。
但啲人玩3RACING，膠車都放隻10.5以上去落去。

一架車有時係慢摩打係睇唔出問題，要用快摩打先睇得出。
另外快車同慢車SETTING亦都唔同。
所以田宮啲車行慢摩打，SET死齒比，就算偏你都唔多覺。
我唔係話TRF果啲。

作者: sean2013 時間: 2020-3-20 16:35
無撞擊下斷A臂,C座

作者: sean2013 時間: 2020-3-20 16:37
佢隻A臂在油壓腳收入去果個位置好易斷

作者: AMAT 時間: 2020-3-21 04:44

sean2013 發表於 2020-3-20 16:37
佢隻A臂在油壓腳收入去果個位置好易斷

頭臂?

果個位置的確係偏脆弱。

但係咪真係唔撞都斷就真係未試過喇。

作者: tc3driver 時間: 2020-3-21 10:35
本帖最後由 tc3driver 於 2020-3-21 14:00 編輯

AMAT 發表於 2020-3-18 12:26
唔覺得YOKOMO有年年出新車唧。
你話有配件上改良呢個係正常唧，咁梗係有新狀況就改動下啦。

一家細公司，有幾多人力可以試齊咁多嘢，既然知道一架車真係無可能等三五七年試齊晒先出，咁就要靠過往比賽成績經驗去作逐步改進，而不是每年大改，大改後大家都知沒有太多時間去測試，要畫圖開模，返樣版測試又再改圖，來回幾次之後已要預備生產大貨，計埋只係幾個月，好多嘢來不及證實已要做生產，其實係搵消費者來攪，如果大部份玩家認為這做法無問題，咁就繼續用這形式運作，有乜衰咪等佢再出補品解決，反正唔夠一年佢又大改出過架新車，話知你班友無零件。
呢個做法其實是不健康發展，產品週期短，零件不兼容，舖頭零售難入貨，玩家見你無零件就自然轉會，因為你根本不遵重自己產品，當佢係玩具，自貶身價，好多時架車玩得一兩年需要買零件，但週圍無得買，就係因為轉款太快又不兼容舊款，生產商已停產，呢啲係趕客行為，Tamiya有樣好值得學習就是兼容性處理，出套420臂可以裝返去其他TB, TT車款，人哋見裝到，咪多套買返去裝吓部舊車，如果不兼容，就少啲人買，所以如果每年都刻意改動吓啲零件而又不兼容舊款，咁就趕走班舊客，你都識計3racing一款車可能賣不到1000架，出件零件仲要不兼容，咁每年最多只係嗰1000人會買你件零件，如果出衰咗，新車銷量下次仲有可能下跌，但如果是少改，零件兼容，風險又低啲，而且架車往績有保證，咁就有機會越來越多人玩，擴大個市場佔有率，這做法才是健康發展。
另外你講Tamiya 420頭杯有問題，呢樣嘢真係壞印象，作為消費者，你自己都唔鍾意啦，"大廠都係咁錯，3racing都可以錯"...呢個思維係不負責任，啲嘢只會越做越差！

作者: emax430 時間: 2020-3-21 14:49
－款車賣唔到1千架？大陸市場咁大都賣唔到？是不是價錢太貴並質素很有問題？

作者: AMAT 時間: 2020-3-22 13:06

emax430 發表於 2020-3-21 14:49
－款車賣唔到1千架？大陸市場咁大都賣唔到？是不是價錢太貴並質素很有問題？ ...

大陸市場好特別，啲人一係玩進口車如XRAY(大陸超多XRAY信徒)，一係就玩平到爆嘅SNRC(因為用到XRAY件)。

香港牌子係國內一啲都唔流行。

作者: ycthk 時間: 2020-3-22 13:08
HK market is small. Mainland market is large but too many copycats

作者: AMAT 時間: 2020-3-22 13:13

ycthk 發表於 2020-3-22 13:08
HK market is small. Mainland market is large but too many copycats

遙控車唔算好多抄嘅......有人抄，但唔會比原裝賣得好。
因為玩遙控車唔係低銷費玩意，你又要落車場玩。
你攞架老翻車人地真係會笑鬼你(果個圈啲人都幾富貴)。

XRAY應該係佔國內市場最高，其次就係YOKOMO(國內代理做得好，唔係偉高)。
國產車賣得只係因為少年賽指定要用。

作者: AMAT 時間: 2020-3-22 13:16

tc3driver 發表於 2020-3-21 10:35
一家細公司，有幾多人力可以試齊咁多嘢，既然知道一架車真係無可能等三五七年試齊晒先出，咁就要靠過往比 ...

唔會話你講嘅說話錯。

不過好坦白講，唔係XRAY YOKOMO等，好多公司RACING車都唔係佢地銷售核心嚟，只可以話係要嚟比賽宣傳用。
市場變化大，你今日唔出，聽日就可能賣唔出。

連AE都要成個TOURING部門摺咗佢唔再出TC系列就知。
最大鑊係連12仔都唔出。

作者: rk2 時間: 2020-3-23 09:31

AMAT 發表於 2020-3-22 13:16
唔會話你講嘅說話錯。

不過好坦白講，唔係XRAY YOKOMO等，好多公司RACING車都唔係佢地銷售核心嚟，只可 ...

Team Associated 成個TOURING 部門摺咗。連 12 仔都唔出。咁呢個品牌，只剩下電越和油越了。但在此範圍內，他仍是最強的。只不過，RC12, TC3 後續無人有些希噓。RC12 算是整個遙控市場起步點而 TC3 是近代電房的起步點。

作者: AMAT 時間: 2020-3-23 12:53

rk2 發表於 2020-3-23 09:31
Team Associated 成個TOURING 部門摺咗。連 12 仔都唔出。咁呢個品牌，只剩下電越和油越了。但在此 ...

TC3未至於，因為TC3行軸。

宜家TOURING設計起步點係YOKOMO MR4TC，成個FORMAT都係跟佢。

AE 12仔近年俾其他牌子食得好勁，加上又冇新設計，自然就向下。TOURING更加唔駛講，基本上係國際比賽A組都冇晒影。

12仔同TOURING都需要大量車手去SUPPORT。AE又冇車手，又俾唔起錢請車，咁落去又增加唔到銷售，咁就不如發展仲有人玩嘅BUGGY好過。

作者: tc3driver 時間: 2020-3-25 07:33
本帖最後由 tc3driver 於 2020-3-25 07:43 編輯

AMAT 發表於 2020-3-23 12:53
TC3未至於，因為TC3行軸。

宜家TOURING設計起步點係YOKOMO MR4TC，成個FORMAT都係跟佢。

好多本地車友都想3racing出12仔，但Jacky就好似聽不到，其實這個時候，3racing出12仔係好有利，但唔好出埋啲古怪嘢好似佢架FGX formula咁，用自己獨特呔鈴玩獨市，要跟據亞蘇士設計作藍本，最好殼柱窿位都跟, 因市場有好多副廠件做support(呔，鈴，彈弓，殼), 亞蘇士唔玩咪3racing頂上，可搶到部份市場

作者: Edwin 時間: 2020-3-25 13:31
睇左咁多位師兄的意見，結論是否都覺得Xray/Yokomo是最高質數？如果係的話選擇Xray/Yokomo會否是貴買平玩，因零件較易買到，兼容性較高及耐用？另外有某D車砌既過程好多位要執過先順，對技術不高的小弟來說係有難度，下次自然不會再選擇。

作者: tc3driver 時間: 2020-3-25 22:31

Edwin 發表於 2020-3-25 13:31
睇左咁多位師兄的意見，結論是否都覺得Xray/Yokomo是最高質數？如果係的話選擇Xray/Yokomo會否是貴買平玩， ...

可以話Xray/Yokomo質數算高，零件方面，Xray易買啲，因Xray兼容性較Yokomo高，較多舖頭有Xray零件賣，eg, Xray差速，手腳，三節棍，馬蹄膠由2015到2020都兼容, 但Yokomo 2015年的BD7到2020年的BD10已經有好大轉變，手腳，三節棍，差速，差不多改晒，Yokomo係好喜歡每年揾啲借口，刻意轉變零件尺寸，不會太重視兼容性，所以Yokomo車零件都不易買到，以前都仲有多幾間賣Yokomo, eg, 偉高,極速，但現在好似得返興發1/F，有時想訂都未必有得你訂，因為停產，所以Yokomo車貶值快(但二手車價較平)。兩個牌子，勝在都多副廠件，因為始終大公司多人買。如果本地牌子3racing價格算合理，但可惜見佢近年設計質量開始下降，又想走Yokomo路線，如果做不好，分分鐘似VBC咁失敗收場，本地品牌又可能少一間。

作者: AMAT 時間: 2020-3-25 23:18

tc3driver 發表於 2020-3-25 22:31
可以話Xray/Yokomo質數算高，零件方面，Xray易買啲，因Xray兼容性較Yokomo高，較多舖頭有Xray零件賣，eg, ...

3RACING同VBC完全兩回事。

VBC係因為幾個PARTNER意見不同拆伙，基本上生產已變成幫XPRESS生產，設計師都過檔埋去XPRESS，自然要關門大吉。
3RACING係JACKY話事，RACING車其實根本就唔係佢最賺錢嘅地方嚟，至於咩車最賺我就唔方便代佢講。3RACING其實幫好多大牌子做OEM，分分鐘你話邊架點好點好嘅車，零件就係佢地做出嚟。

作者: AMAT 時間: 2020-3-25 23:23

tc3driver 發表於 2020-3-25 07:33
好多本地車友都想3racing出12仔，但Jacky就好似聽不到，其實這個時候，3racing出12仔係好有利，但唔好出埋 ...

好坦白講，3RACING設計車，其實都係由祺哥負責。祺哥出車好講佢自己鍾唔鍾意同埋有冇市場，仲有佢鍾唔鍾意玩。
呢個係3RACING設計同其他唔同地方，佢係隨佢鍾意，而唔係單純睇市場。

12仔如果咁好賣，就唔會連AE都摺咗12仔部門。佢未摺之前，望一望個市場，A MAIN B MAIN入面有幾多架係AE 12仔?一定唔少。
AE都要摺，就好大關係到呢個市場究竟係咪養得起佢地一條TEAM。

如果個市場根本就唔係一個可以養得起嘅市場，點解仲要鍾個頭埋去?
你諗下宜家出面比賽，我講香港，有幾多十二仔比賽?
再睇下3RACING最大市場日本，台灣等，每年有搞幾多十二仔比賽?

作者: AMAT 時間: 2020-3-25 23:26

Edwin 發表於 2020-3-25 13:31
睇左咁多位師兄的意見，結論是否都覺得Xray/Yokomo是最高質數？如果係的話選擇Xray/Yokomo會否是貴買平玩， ...

XRAY今次架T4 2020，無論質量，車行出嚟，我可以講，係近年XRAY中最差。

好多人都話今次啲質量係嚇死人，架車如果同BD10比，原裝行出嚟好大差距。

所以出咗唔夠一個月，成條街都係二手放返出嚟。

作者: tophand88999 時間: 2020-3-26 11:11
3Racing 膠件偏軟，收M3x6 螺絲位，好快滑牙要用M3x8,

差速漏油，除MG 冇漏，3000号油果D差速全漏，O ring 好直钱咩

我覺得，MG 同 D4 算係問題較多車型，按說明書砌好，調都調好耐

作者: Edwin 時間: 2020-3-26 15:44

AMAT 發表於 2020-3-25 23:26
XRAY今次架T4 2020，無論質量，車行出嚟，我可以講，係近年XRAY中最差。

好多人都話今次啲質量係嚇死人 ...

同意，我都算係Xray 擁躉，但對近來個别Xray既產品品質的確有点失望。想問下各師兄如想轉會，以造工準繩度及質料衡量，Awesomatix 或 Infinity 會否比Xray好？謝謝。

作者: AMAT 時間: 2020-3-26 23:08

Edwin 發表於 2020-3-26 15:44
同意，我都算係Xray 擁躉，但對近來個别Xray既產品品質的確有点失望。想問下各師兄如想轉會，以造工準繩 ...

AWESOMATIX一樣係麻麻地，唔好期望咁高。
INFINITY新車未正式出街，未知。

作者: ivan仔 時間: 2020-3-27 11:10

Edwin 發表於 2020-3-26 15:44
同意，我都算係Xray 擁躉，但對近來個别Xray既產品品質的確有点失望。想問下各師兄如想轉會，以造工準繩 ...

都沒咩可以選擇, 只係由一個火坑去第二個火坑

作者: rk2 時間: 2020-3-27 11:56
玩遙控車，跟本就是一個大火坑。

作者: ivan仔 時間: 2020-3-27 15:00

rk2 發表於 2020-3-27 11:56
玩遙控車，跟本就是一個大火坑。

所以就係睇下自己想點, 沒野係完美, 要試過中過先知咩係好

作者: 3888 時間: 2020-3-27 18:53
近日砌咗架 M4 Pro ，比好幾年前玩過架 Ultimate 係有進步，D parts 虛位係小咗。

作者: AMAT 時間: 2020-3-27 22:11

3888 發表於 2020-3-27 18:53
近日砌咗架 M4 Pro ，比好幾年前玩過架 Ultimate 係有進步，D parts 虛位係小咗。 ...

其實的確3RACING第一水會爭小小，但第二第三水通常都會穩定返。

作者: gos 時間: 2020-3-28 20:58
即係每逢3racing出新款車既第一水貨就唔好買, 要第二水以後先好買

作者: tc3driver 時間: 2020-3-28 23:08

gos 發表於 2020-3-28 20:58
即係每逢3racing出新款車既第一水貨就唔好買, 要第二水以後先好買

一般做開工程生產(包括機械，電子，軟件)的內行人都知，第一水真係有風險，第一批買嘅人係蝕底，所以好多時第一批貨會有優惠，有時送啲小禮物比你，而且始終會有人喜歡新嘢，如果有新車出，你又忍到手，最好都係等吓好啲，舉例3racing 20M條前皮帶，第一水的師兄砌完發現都是鬆，結果3racing再出個金屬牙差托解決，之後第二批已經包埋不需另買，但正如版主所講，係咪衰到行唔到呢？咁就好睇間公司嘅處理態度，如果死不認錯，咁係最衰，如果肯改，都叫做有誠意，但就留有壞印象比人，所以買第二水係較安全

作者: tophand88999 時間: 2020-3-28 23:51

tc3driver 發表於 2020-3-28 23:08
一般做開工程生產(包括機械，電子，軟件)的內行人都知，第一水真係有風險，第一批買嘅人係蝕底，所以好多 ...

試產件都賣，壞咗口啤，後果更嚴重

作者: AMAT 時間: 2020-3-29 00:18

tophand88999 發表於 2020-3-28 23:51
試產件都賣，壞咗口啤，後果更嚴重

佢有免費更換。

作者: AMAT 時間: 2020-3-29 00:21
又問心咁講。

3RACING車如果發現個問題係普遍性，佢通常都會有件俾人免費更換。

但如果係XRAY出現呢，你估幾耐或有冇件俾你更換呢?

Yokomo BD9果時俾人話造功差，最後，又有冇得更換呢?換又幾耐呢?

如果有入3RACING FB GROUP就知，祺哥好快回覆同會立即話幫你換。
咁佢係咪唔負責呢?我覺得佢就好負責啦。

作者: tc3driver 時間: 2020-3-29 10:44
本帖最後由 tc3driver 於 2020-3-29 10:46 編輯

AMAT 發表於 2020-3-29 00:21
又問心咁講。

3RACING車如果發現個問題係普遍性，佢通常都會有件俾人免費更換。

個牙差托好多師兄自己另外比錢買，如果免費更換，做乜當時網頁FB都無告示？！日後如有類似事件，無需做得咁鬼祟，可做得更好

作者: AMAT 時間: 2020-3-29 18:07

tc3driver 發表於 2020-3-29 10:44
個牙差托好多師兄自己另外比錢買，如果免費更換，做乜當時網頁FB都無告示？！日後如有類似事件，無需做得 ...

佢地好似係FB有講，至於詳細，都係建議去返去佢地個討論區問佢地喇。

歡迎光臨 RC EVOLUTION - 遙控工房 - 香港RC遙控車討論區 (https://jk.rc-evo.com/xbbs/)