RC EVOLUTION - 遙控工房 - 香港RC遙控車討論區

標題: 大家睇咗幪面超人BLACK SUN未呢? [打印本頁]

作者: AMAT 時間: 2022-11-1 13:20
標題: 大家睇咗幪面超人BLACK SUN未呢?
[Youtube]dfAX4-YnfGA[/Youtube]

大家睇咗幪面超人BLACK SUN未呢? 雖然話就話AMAZON PRIME先睇到，但其實如果上Google到搵下，應該都會搵到唔少有得睇架喇..... 今次嘅劇同NETFLIX果啲一樣，一上載就係全部十集，所以唔駛等，要睇你可以一晚睇晒佢。
呢個VIDEO就係套劇，最尾一集時，開頭出現，模仿返當年幪面超人BLACK嘅開場曲。坦白講，其實個劇情你可以話BLACK SUN同BLACK係有參考性同有啲情節或人物相近，但係風格同深度，兩者都好大分別。所以有人話點解當初唔搵返倉田てつを做男主角，當你睇返個劇情就會明，連今次BLACK SUN嘅主角西島秀俊都話，佢都想俾返人工出嚟，想拍返一套佢屋企自己小朋友睇得嘅版本呢...... 因為今次BLACK SUN血腥度係比較高(但比起AMAZONS係低，我覺得)，劇情想講嘅嘢都深好多，小朋友真係睇唔明想講乜，搵返倉田てつを可能唔係太合適。
由於唔想劇透太多，咁就唔講咁多劇情。但個人覺得故事結構係完整，前文後理都算係合理，尤其是怪人點解出現等等。但當然中間有啲人物心理變化，係有小小怪怪地(如SHADOW MOON後尾嘅轉變)，但整體會比AMAZONS更完整先。另外個故事唔係HAPPY ENDING嚟，即係你唔好諗住之後會有呢個RX版出現喇。
講返呢個開場VIDEO，如果係以前有睇BLACK嘅，回憶真係返晒嚟。聽到倉田てつを嘅唱，又諗起之前關於佢同BLACK之間啲風風雨雨，又有小小諷剌感。但感覺呢套劇，係擺到明俾細個睇BLACK果班人嚟睇。
整體嚟講，唔駛學似AMAZONS咁等兩季先睇得晒，開心好多。AMAZONS其實基本上係靠仁叔撐起。今次BLACK SUN陣容真係強好多，西島俊也，中村倫羊，吉田羊，濱田岳..... 比人感覺係正宗電視劇多於特攝，亦都適合睇佢入面內容嘅定位...... 個人係比較不滿筧美和子死得太快。
至於有冇興趣買佢嘅玩具...... 咁SHF出的話，都會買嘅，怪人形態同拉打形態都可以嘅，但佢果條變身腰帶就真係麻麻地喇。
想睇喇朋友，自己去GOOGLE搵片啦，我就唔提供喇~

歡迎光臨 RC EVOLUTION - 遙控工房 - 香港RC遙控車討論區 (https://jk.rc-evo.com/xbbs/)