TT01入門攻略 - 新手必讀

此貼文目的係為玩TT01 O既入門朋友對TT01有個PREVIEW同埋知到架車有咩問題,邊O的地方要改,邊O的地方唔駛.

遲下會係工房網頁到出一下正式O既版本.

ENJOY!

TT01可以話係最近最多新手談論O既話題,因為佢係田宮最新推出,取代TL01用O既入門級車架.雖然好多比較高階O既玩家對其評價並不高,但由於價格便宜,升級配件價格亦唔算好貴,所以得到好多入門買家青睞.基本上,新買返嚟係咪就可以即刻玩得呢?可以話係,但我地可以做一O的手腳令到佢跑得更好!

首先講O既係驅動系.由於TT01係一O架中軸驅動車,佢O既中軸運作,基本上就係佢O既全車命脈所在,如果佢運行得唔好,就成架車O既運作大打折扣.

由於TT01屬入門級,所以基本上佢O既膠料都係偏向差小小,唔似得中級車甚至入門車咁順.新買返嚟組裝之後(又或者買RTR KIT計),你會發覺佢中軸係轉得好唔順暢.咩叫做順,咩叫做唔順呢?係你冇裝摩打情況下,你用手指推轉大齒,你係會覺得佢轉唔順,唔係一推可以轉幾圈果隻.其一係因為你未改全車啤鈴,其二係佢入面部份膠做得唔夠準之過.

圖中你見到白色果粒膠圈,係大齒同銀色杯士(原裝係白膠杯士)之間果一粒用嚟夾住大齒(原裝大齒白色)同佢入面支PIN 既一個膠圈過厚,頂住兼夾到實晒,所以令佢轉唔順.好多原裝TT01都有呢個問題,當然,亦有部份冇呢個問題.但如果遇到真係咁果時,點解決呢?

解決方法就係磨薄佢!用大概250號水磨沙紙(圖中係木沙紙,應該係用黑色O既水磨沙紙)磨佢!記住唔好掛住一味磨喎,要磨一陣,放佢落車到試一試FIT唔FIT位,磨到FIT喇!又唔太鬆呢,就用500號水磨沙紙FINE TUNE.當呢粒膠圈磨好,你再放上去用,就算未用啤鈴,你都會發覺佢轉得順好多.

最好O既中軸應該係一轉佢至少佢會轉到十幾圈先停(未裝摩打計),但我地當然唔好對TT01要求太高,基本上佢轉到五六圈到已經係好好,當然係未裝啤鈴情況下,轉到三四圈已經好好.但我肯定咁講,你咁FINE TINE過成份中軸係會順好多.

當然,亦有部份版友建議,換一粒相同呎碼O既啤鈴落去.如果你肯花多十零蚊,再花些少時間去搵,咁都問題不大.如果你懶,唔想搞,咁就.....磨啦!哈!

另一個FINE TINE點係懸掛臂.原裝返嚟O既懸掛臂,裝上去之後,係未裝油壓情況下,你用手嚟上下用佢,佢係好實,都幾難郁.咁係玩車O既角度嚟睇係完全唔合格!好O既懸掛臂應該係當你水平放時,佢係好輕易咁自動向下跌落嚟,但又唔會鬆到話有虛位,咁先係正常.因為你如果懸掛臂太實,係會影響晒你油壓同懸掛操作.你話兩邊都咁實就話好唧.但左右兩邊都實得嚟係唔平均O既,咁會對你架車轉向性能大打折扣.中級車同高級車O既解決方法係用PIN,但TT01冇PIN,所以就要磨喇!

基本上就係磨懸掛臂插入去車架果個凸出部份.用250度沙紙磨,又係啦,磨得一陣要插落去試一試位,睇下會唔會太虛,定係太緊.同埋留意磨係打轉咁磨,要小心避免磨到凸出來果部份成三角椎型.呢個部份係需要心機同時間,因為你要磨足足八對臂,每對臂都係兩邊,所以都幾考耐性.

磨好O既臂,你裝上去之後,係你一放心就好輕易咁向下落,但又唔會有左右虛位鬆動.咁呢個工程就叫完成.

之後就到齒箱部份.原裝TT01跟俾你O既大齒齒入面O既齒,佢係叫你用原裝之雪油整落去作潤滑.但實際上呢,只可以作潤滑,功用就不大.因為齒差O既作用係差速,但如果齒差太鬆的話,對TOURING車嚟講,係會浪費咗好多動力,至於點解,可以參閱我地工房有關差速O既文章.所以我地要令佢入面實淨O的,唔好咁鬆!

方法就係加入AW GREASE.AW GREASE對玩遙控車O既朋友好有用,基本上玩車都要準備一支.一支大概十零廿蚊到.佢O既特點係好杰,使用係金屬與金屬磨擦位置之間,有抗磨損性.我地加佢落個齒差入面O的齒到,一方面係增加抗磨損性,二則因為佢杰,所以令個齒差行起上嚟實O的,咁O架TOURING係操作時,個驅動系就冇咁晒力.當然,最好係買俾油車用O既齒差速膏,但我發現近年大部份出面都冇得賣齒差速膏,得返油.齒差油絕對唔適合用係TT01呢個大齒箱到!因為會漏油.係冇得賣情況下,所以就唯有用AW GREASE.如果你買到,就買大概5000-10000度O既齒差膏用.基本上個用法係,填滿佢就係.但AW GREASE貴,所以搽均O的齒已經好好,你有齒差膏先填滿佢咁用啦.留意喎,唔好以為落咗就用一世,過一排係會有漏又或者係冇咁實情況出現O既,屆時就要拆開佢,加一加油或者換油.

另外,田宮本身亦都有出過一隻比齒差用O既齒差油(橙色果支).我用過覺得效果都幾好,亦唔會話太稀,會有漏出嚟O既問題,亦可以不妨試用.

組裝好O既大齒,係個大齒到就真係加一圈佢原裝俾O既雪油,等佢RUN起上嚟果時順O的,咁基本上就已經搞掂晒.大工告成!

留意,唔好整第O的油落去,除非佢係專俾遙控車GEAR用.亦唔好落AW GREASE或齒差油落去!咁只會適得其反!小心小心!

另外仲要注意O既係佢尾HUB杯,原裝裝落去懸掛臂到,又係會好緊好實.

同樣地,一頭一尾部份,比小小心機,磨一磨佢,等佢唔好同懸掛臂逼到咁緊就可以.同樣地要小心磨,磨一陣要試放一下,同埋磨O既手勢都好緊要,要呈水平咁磨,唔係的話分分鐘磨到中間弧形,又或者會斜埋一邊,咁就大鑊喇.要小心留意.呢個部份我會建議用150號水磨沙紙磨,因為呢個HUBS比較硬,用粗小小沙紙先磨,之後再用500號嚟FINE TUNE,咁會快好多.

其他配件只要跟住說明書咁做,問題都應該不大.就算真係有問題,都係因為車架問題,要用OPTION PARTS解決到,所以搞唔到.

原果你只係要求玩原裝車,跟據以上方法執車,再配埋全車啤鈴(大概85蚊港元),咁就已經可以搞掂晒.

下一PART講O既就係點樣改裝架TT01令到佢更好跑.更好操作.

所有文章內容,相片,全歸RC EVOLUTION遙控工房所有.
請勿在未經授權下轉載任何文字及圖片.