本帖最後由 kevt2005 於 2012-3-22 13:58 編輯
小弟係喜歡玩棉呔嘅其中一位車友, 喺度亦想分享下我嘅感受同意見. 小弟開始玩遙控車已經係好多年前嘅事, 但實際累積玩車時間唔算長, 其中我玩過1:8油車, 1:10電車, 1:28 Mini-Z 同1:43 dNaNo. 基本上係愈玩愈細, 而主要原因係我係個喜歡玩車而唔鍾意整車嘅人, 又或者講想大部份時間玩車而唔係喺度整車同set車嘅懶人. 對我嚟講, 玩1:8果段時間係80%整車同set車, 而dNaNo係90%時間玩車. dNaNo場結業後, 大概7-8個月前我就重拾Mini-Z. 走去買咗部紅色特別版MR03(貪佢唔使再多改就玩得), 然後走上兩個車場試車同睇下個場, 後來揀咗上MMS, 主要係因為有舊車友一齊玩, 同埋個場較寬敞. 玩玩下見其他師兄啲車又快又定, 心癢癢就開始請教師兄們買啲乜parts upgrade同點set架車. 聽完唔同嘅意見, 上網揾下資料, 有機會就問師兄借parts嚟試, 就係咁parts買完一件又一件, 車又買下買下又多架, 而家有3架MR03, 2架MA015, 1架MF010特別版, 1架MF015, 1架MB010. 因為有玩dNaNo棉呔嘅經驗, 我就問啲師兄mini-z有冇棉呔玩, 幾位玩咗好耐嘅師兄都話棉呔係有但係棉呔唔好玩, 叫我玩膠胎, 於是就開始買唔同嘅度數嚟試, 但試咗好耐都搞唔到好似其他師兄嘅效果, 差唔多想放棄嘅時侯有個舊車友借咗set棉呔我試, 一試之後就中毒, 架車變得又快又定又聽話, 仲快過曬之前我過唔到嘅師兄, 咁你話係咪又開心又興奮呢?
講到哩度我要特別强調一點, 我同其他都被棉呔毒到嘅師兄, 都從來冇放棄玩膠呔. 喺上次比賽前兩星期我直情完全冇玩過棉呔, 集中用膠呔set好架車準備參加小弟第一次Mini-Z比賽, 而比賽果日係我喺車場半年多嚟最開心嘅一日, 小弟亦好幸運入到B組比賽, 雖然冇獎囉, 但已經遠超自己嘅預期. 我特別强調係因為有啲師兄硬係認為喜歡玩同支持棉呔嘅人就係反膠呔, 所以想澄清一下.
至於係咪棉呔整爛張舊毯, 樓上"者父1177"師兄嘅解釋較合理. 亦好期待"邪靈"師兄嘅分享.
尋日同場主坦誠咁傾咗好耐, 佢根本唔介意各車友用乜parts, 膠呔或棉呔, 佢最緊張係張毯要換(但完全唔係錢問題), 因為張毯咬唔咬完全係因為積存多年嘅呔屎, 而好似樓上師兄講棉呔吸走啲呔屎, 令到原本被呔屎粘實嘅毛起番出嚟, 加上張毯已經8年, 於是啲毛好容易被拖走. 正如之前講哩個講法較合理, 但我亦有問點解隔離場好似冇同樣問題, 因為我有過去試過, 玩咗一粒鐘都冇粘起啲毛, 而果邊張毯雖然冇MMS舊毯咁咬, 但玩棉呔嘅感覺返曬嚟, 而我見唔到張毯表面有呔屎. 當然唔可以單單以我個人短短一小時就可以證實啲乜, 希望"邪靈"師兄可以俾啲專業見解, 不過我會諗其實會唔會有其他物料造嘅毯可以唔使靠呔屎嚟令佢咬呢? 我都唔知會唔會有, 但我只知唔去試就一定冇. 無論如何我一定會專重場主最後決定, 亦會守規, 但我亦對場主表明我一定會少啲上嚟多啲過咗隔離玩, 因為我唔會放棄玩棉呔, 而我亦唔會唔玩膠胎, 下次目標係入A組!
師兄如果你睇到哩度, 我十分感激, 最後希望各車場生意蒸蒸日上, 各車友最緊要玩得開心! |
樓主: kaka820
[複製鏈接]
樓主
又真係幾過癮喎！新相！
