中置唔中置？

AMAT · 發表於 2019-9-20 02:32:06

遊客登錄

您需要登錄才可以下載或查看，沒有帳號？新玩家註冊

x

登錄/註冊後可看大圖

70440869_2415909611978701_3309111369143418880_n.jpg (188.01 KB, 下載次數: 47)

下載附件

2019-9-20 02:31 上傳

相信呢排玩車最hot嘅話題，應該係買唔買中置kit嚟改。唔少牌子嘅車都推出咗中置kit，例如第一間先行嘅Zero Tribe出俾Xray，之後Arrowmax出俾Xray同Yokomo用嘅kit，仲有Xpress XQ1系用嘅中置，3Racing成架中置車架，甚至係AE TC7.2都出咗。

其實可能唔係好多人知，當初Zero Tribe出俾Xray，係因為國外好多人仲係玩緊舊款Xray，而Xray某程度上有一定共通性，所以出果套kit係由T4 17至19都用得，變相將舊車翻新又玩得。呢一下其實係好大市場。唔好講Xray，外國好多人仲玩緊415嚟鬥車，只要有Parts出一日，佢地都會繼續玩。

但除咗呢個問題，究竟換中置有冇著數呢？尤其是唔少牌子都賣到成千銀，真係就嚟買多架車。或者我從我地工房自己開發417中置測試嘅感覺分析下。

中置其實唔係咩新鮮事，田宮TA05就出過，原因係俾中階玩家有一架容易操控嘅車。一則重心接近中間，二則因為尾皮帶較長，摩打出嚟嘅力亦較柔和。所以中置相比起一般touring設計，係灣會較圓但唔係推，但直路加速就會較差。但TA05後，去到TA07先返嚟，唔計田宮盃，但又冇人攞嚟出比賽車。其實上文都講出咗原因，直路加速唔夠快。所以你唔見Xray或Yokomo出一架中置比賽版本。

但點解宜家又會有人出kit，除咗賺大家錢，亦因為宜家嘅電子設備越嚟越快，摩打亦越嚟越高速，係電子上嘅優點，例如可以較turbo，某程度上抵消咗中置尾皮帶係加速開turbo果一下嘅突然性，令效果更柔順易掌控，又可以享受到佢係灣時圓滑嘅轉向感，所以越嚟越多人用。

不過，如果假設係同一款車，係一模一樣電子設備同setting下，你會發覺中置係會慢過正常設計嘅小小，但平均值又會係中置好啲。所以兩者各有優點。

所以變相宜家唔少人，包括我自己，都會一架正常一架中置落場，同一條呔各試一轉，咁就會知掌日setting邊個較佳用邊架。而我地自己測試正常設計同中置下，同一套呔，尤其係尾呔，中置相比較係會耐啲overheat，而係場地traction不足時，又或者呔唔咬，中置都會寬容度大啲，會易掌握啲。如果場地多灣，如呢排嘅PYC setting，大量髮夾，中置會好走啲。但如果係早前大量高速直路可full雞開turbo嘅，就正常後置設計會有較佳時間。其實有啲似早排玩SSBB定正常油壓，都係同場地大小，灣路設計有關係。亦都因為咁，你唔會見Xray或Yokomo自己出一架中置，因為世界賽啲比賽場地，多數都係大場嚟，直路長，灣又多高速灣，出一架中置嚟俾車手嚟比賽，似乎唔係太過合適。反而係亞洲地區一啲場地，好似香港啲場地咁，比較係多灣，咁就比較合適。當然，我地唔排除有日佢地會出一架中置嚟賣，始終係有市場，等同FWD本來得日本仔亞洲地區玩，Xray都出一架出嚟一樣。

現實問題，買唔買？有錢就當然買啦，玩車唔試過邊心息。不過我都會話睇你去邊玩。如果你係入PYC或TRC嘅，換係會好啲啦，但都要睇場layout。但如果你係玩佐敦谷嘅，我覺得就唔好晒錢，盞覺得慢。另外亦要睇你用咩摩打，如果係玩開快摩打，開turbo，咁可以試下佢反應有咩差別，但如果係玩17.5嘅，又唔係開turbo，就唔好晒錢，你會覺得架車好推唔識轉灣。

不過如果可以出啲唔好下下成千嘅conversion kit，可能大家會樂於去買。

d.s · 發表於 2019-9-20 10:21:58

認同版主文中所指
中置後置各有優勢

不過何解突然流行出中置kit?
是否因為近年最先出中置kit比自己嘅品牌Awesomatix所影響 ?

sean2013 · 發表於 2019-9-20 10:43:56

無野揾野改,改一改又扮創新,只係風氣,驚執輸
其實生意手法,揾錢技倆
係世界冠軍唔中置都贏

rk2 · 發表於 2019-9-20 10:52:36

遲多一／兩年，會由中置改為傾前？

ICY · 發表於 2019-9-20 11:36:53

sean2013 發表於 2019-9-20 10:43
無野揾野改,改一改又扮創新,只係風氣,驚執輸
其實生意手法,揾錢技倆
係世界冠軍唔中置都贏

師兄你真係講出哂我心聲
d人都唔明，係勁有技術有知識既，渣乜都放你星，唔識玩既，買乜新車新產品都玩到pat屎咁架啦
係本地搵幾個贏到幾隻飛機杯既大茄打d分享文氹人落答，真係傻既先盅個頭埋去比佢呃

AMAT · 發表於 2019-9-20 11:57:24

d.s 發表於 2019-9-20 10:21
認同版主文中所指
中置後置各有優勢

個人意見係，先作為一個GIMMICK，但後來發覺有優勢，所以個個都出。

AMAT · 發表於 2019-9-20 11:58:08

rk2 發表於 2019-9-20 10:52
遲多一／兩年，會由中置改為傾前？

其實都睇當時唧技術發展，例如摩打，電池重量等等。

sean2013 · 發表於 2019-9-20 12:47:45

ICY 發表於 2019-9-20 11:36
師兄你真係講出哂我心聲
d人都唔明，係勁有技術有知識既，渣乜都放你星，唔識玩既，買乜新車新產品都玩到 ...

年年都要揾D野扮改良, 唔改又俾人覺得唔創新,落後
有少少改動D人就一鍋蜂追求
睇下420未又係咁,使鬼中置,
根本黎黎去去就係䇔車果幾個人
佢地玩乜都䇔㗎啦,唔中置唔代表會輸
一句講晒 .....多_余

AMAT · 發表於 2019-9-20 14:54:15

中置與否，同贏車與否冇直接關係。

但係一架中置同唔係中置，揸出嚟感覺係兩種完全同特性，對於唔同人手勢嚟講，中置會較容易掌握。
呢個係特性上事實，唔係改小小感覺唔到分別。

要陰謀論覺得係呃人錢，咁其實不如唔好玩遙控車，遙控車本來就係非必須品，本來就係呃錢。

dttmtong · 發表於 2019-9-20 17:27:54

其實自己都可以試到有乜分別，點可以話呃呢？

dttmtong · 發表於 2019-9-20 17:31:00

玩相機丶玩單車丶玩 Hi Fi, 玩好多野都係咁，少少的分別可能要俾多幾倍的價錢。比賽就係追求個 0.1 秒的差別，有要求嘅咪買貴啲，無要求嘅去返斗城買部 ready to run

AMAT · 發表於 2019-9-20 20:12:45

dttmtong 發表於 2019-9-20 17:27
其實自己都可以試到有乜分別，點可以話呃呢？

遙控車呢啲比例細，速度大嘅玩意，其實只要差小小，就可以差好遠。

最簡單一個例子，個搖桿多1MM戒子墊一墊高，感覺已經有分別。
油壓高一格或低一格，已經有分別。可能本來唔夠轉變成夠，可能本來好快OVERHEAT條呔，之後就冇.......

個摩打由近尾改成近中間，其實已經分別好大。仲有尾皮帶長度出嚟果下力.....

差小小就已經可以差好遠。

hing830 · 發表於 2019-9-20 21:32:12

AMAT 發表於 2019-9-20 20:12
遙控車呢啲比例細，速度大嘅玩意，其實只要差小小，就可以差好遠。

最簡單一個例子，個搖桿多1MM戒子墊 ...

師兄請問如果同一樣設備，油壓裝法企D，同斜D，邊種入入灣同灣中好D.

AMAT · 發表於 2019-9-21 11:23:54

hing830 發表於 2019-9-20 21:32
師兄請問如果同一樣設備，油壓裝法企D，同斜D，邊種入入灣同灣中好D.

要睇架車特性先答到。
要睇下架車係頭轉定尾轉。

企啲係ROLL入去，斜啲係掟入去。入灣計。

以我自己嘅SETTING，正常放置我係尾企啲，中置我係尾斜啲。
因為正常放置反應快啲，我要佢尾唔好咁掟入去，灣中唔好甩。中置入灣反應唔夠快，我要佢尾斜啲掟佢入去，而佢中灣定特性幫我定住唔會甩。

hing830 · 發表於 2019-9-21 12:55:02

AMAT 發表於 2019-9-21 11:23
要睇架車特性先答到。
要睇下架車係頭轉定尾轉。

謝謝解答

1BM · 發表於 2019-9-29 17:43:12

sean2013 發表於 2019-9-20 10:43
無野揾野改,改一改又扮創新,只係風氣,驚執輸
其實生意手法,揾錢技倆
係世界冠軍唔中置都贏

絕對同意

Toby144 · 發表於 2019-11-21 13:03:20

AMAT 發表於 2019-9-20 14:54
中置與否，同贏車與否冇直接關係。

但係一架中置同唔係中置，揸出嚟感覺係兩種完全同特性，對於唔同人手勢 ...

講得好好和直接...i like...!
唔同人有唔同愛好車種...!
同意Rc 非必須品...!

wingscreamer · 發表於 2019-12-1 11:39:13

Good.....

ivan仔 · 發表於 2019-12-19 10:19:55

TRF419X 會出中置嗎? 都仲有好多419X XR

AMAT · 發表於 2019-12-19 11:46:41

ivan仔發表於 2019-12-19 10:19
TRF419X 會出中置嗎? 都仲有好多419X XR

搵人借架419X同419XR俾我，我咪考慮下。

冇車何來整?

同埋整都係整中置摩打而唔係中置PULLEY啦~

		自動登錄	找回密碼
密碼			新玩家註冊

[技術分享] 中置唔中置？

遊客登錄